早前杜汶澤因為喺伍樂城音樂會上，話當年自薦要求楊受成開部《DIVA》俾佢，仲話保證可以令祖兒憑該片封影后，結果反而造就自己封帝。結果這番話令祖兒大動肝火，直言阿澤係佢喺娛樂圈唯一討厭的人，阿澤自知玩大咗，即於同日內於facebook兩度向祖兒公開道歉，祖兒受訪時直言話要教訓下佢，要一段觀察期，睇下是否原諒佢，但就言明唔會再同佢合作拍戲。當時祖兒仲話：「君子之交淡如水，可以觀察，俾啲時間。」
可是未幾卻有高登仔發現，祖兒於去年曾公開表示想攞影后，更笑言因為嗰排阿澤好紅，所以一定要捉實佢，等到對方幫佢拍戲直至攞到影后為止。《DIVA》係2012年作品，呢番話就係去年講，真係唔知邊句真邊句假，亦唔知係祖兒想法反覆，定係如傳聞所講，因為阿澤背地裡話過祖兒男友劉浩龍比唔上女方，因而借題發揮喇。
不過呢句「君子之交淡如水」真係幾好用。《3D豪情》首日上映，票房收126萬，成績非常唔錯，阿澤唔知有心定無意，在facebook引用祖兒說話：「君子之交淡如水，觀眾之情濃如酒。感謝大家支持，我已被大家灌醉！」會否又言者無心，聽者有意呢？