樓價受負面消息困擾 ，連銀行都平賣套現。一位行內好友指出，最近一次拍賣中見到銀行取態積極，肯落價賣貨，他估計連同其他有意掟貨的業主在內，樓價好大機會跌兩成。早幾個月前有一傳聞，指銀行對內地客的財務背景相當關注，更企圖「若果一欠款便收樓或是重估物業補差額」，以減少對銀行壞賬的風險；市場人士指出，銀行不嬲都有這政策，但若果客戶準時還款又好難藉故收樓。最近便有一手持西九多個物業的內地客，因還款不足，銀行將其中一個大單位放盤，當賣出成功減債後，便放回另一個細單位予內地客，不欲急售。
假豪宅首當其衝
老樓從多個渠道了解，個別來自浙江省的內地投資者，因無眼睇本港樓市，加上原居地亦要撲水自救，只好低價放售在港物業，這股內地散倉潮應是跌市源頭，尤其是當年被內地客吸納的假豪宅首當其衝。
最近半年開售的樓盤，集中火力搶本港客，雖回贈多項稅項，好像大平賣，感覺跌價好多，但因大部份均為本地客和用家，頂多只取到額外雙倍印花稅回贈和提早完成交易折扣，約為樓價一成左右，似有誤導之嫌，實際攞到盡的買家其少。銀行跟風減價，在過去亦有帶頭下跌的作用，令到與業主盤互相競爭，由於要價唔要貨決心甚大，骨牌效應樓價下行風險越來越高。
劉兆昌
資深地產傳媒人
http://www.HKLau.com