最近網上球迷熱話，係要搵一個可以陪佢睇波嘅女朋友，我聽見之後，笑而不語。我老婆唔睇波，本來佢就對足球冇乜興趣，相識前冇興趣，相識之後因為我嘅原因，更冇興趣。哈，唔好以為我會有啲唔開心，一啲都冇，不單止冇，甚至有啲……
點解我心理咁唔平衡？即係咁，你自己鍾意嘅嘢，係咪一定要身邊嘅人都鍾意埋一份呢？我認為唔係，當然咁啱大家都鍾意就梗係好啦，否則勉強實冇幸福。
我老婆真係唔睇波，我哋一齊去球場睇波冇試過，一齊睇晒一場電視直播亦冇試過（全程坐喺隔籬講電話唔算啦），有時諗諗吓，佢非但係唔鍾意足球，直頭係討厭足球，反而益咗我多啲一個人嘅時間同個波呢位情人相處，我唔係專登令到佢遠離足球，但諗番轉頭，都係我衰。
首先，足球對於我嚟講，好多年來就係返工嘅代名詞，「老婆，我今晚要返工呀。」，「老婆，假期嗰兩日我要講波呀。」而為咗令到佢唔覺得我係寧願講波都唔返屋企，所以講嘅時候語氣梗係有啲唔耐煩，你有冇見過人話「我星期日要返工呀」嘅時候係嬉皮笑臉，正能量咁樣㗎？然之後，響屋企得閒睇吓波啦，又好鬼辛苦喎，又要捱夜「你瞓先啦」又要半夜起身「我瞓一陣先，半夜要起身睇波」，另一半見到我日夜顛倒精神不振，就好自然聯想到足球係衰嘢，咪掂！
好嘞，睇完波嘞，第二朝見到我，又成副生意失敗咁樣（勝利球迷唔明咁多），冇計，唔通你可以講得出「噚日輸5球咋，叻咗呀」嘅大話咩。再加上球迷永遠只有贏家抽輸家水，老婆睇見朋友聚會我通常都係被抽乾嘅一個。再加埋前排韌帶斷埋，又係多得踢波……
就係因為咁，我老婆唔睇波，於是乎比起一般老公，我多咗好多私人時間，睇波時唔使講嘢，淨係大叫同爆粗！呢種一個人嘅迷離境界，未婚嘅你，應該唔明。
KEYMAN
now TV主持