NBA兩大球星勒邦占士同杜蘭特，上周五常規賽都寫下個人紀錄新一頁，可惜齊齊輸波收場。歌星Pharrell Williams上身嘅熱火前鋒占士，主場對木狼攻入34分，成為聯盟最年輕累積23,000分嘅球員，球隊雙加時下以121:122不敵木狼；雷霆前鋒杜蘭特就算得分紀錄追平米高佐敦（MJ），球隊亦作客以107:111不敵火箭。
今季MVP睇個勢唔係占士就係杜蘭特，兩人上周五都有傑作，占士全場取34分，可惜隊友查米斯唔生性，法定時間同第1次加時完結前都有兩個罰球機會，入晒就贏，點知佢兩次都兩罰中一，搞到要打第2次加時，結果俾木狼由路夫3分球奠勝。
以29歲零95日打破拜恩紀錄，成為聯盟最年輕累積23,000分嘅球員，占士就算輸波，心情都好靚；事關佢賽後扮Pharrell Williams咁戴上招牌高帽，唱住對方名曲《Happy》見記者；不過佢就怪責隊友唔畀佢處理最後一擊。熱火唯一安慰，係溜馬同日都輸畀速龍，仍然係東岸1哥。
杜蘭特「25+」追平MJ
雷霆上周四神勇截斷馬刺19連勝，但「背靠背」上周五征戰侯斯頓，教練史葛布克斯安排「二少」韋斯卜克休息；結果「大少」杜蘭特面對針對性防守拎到28分，平佐敦連續40場25分或以上紀錄，但球隊就以4分之差輸波，要追馬刺升上西岸1哥就難上加難。