日本女足2011年首奪世界盃，令大家對大和撫子刮目相看；估唔到連班小師妹都好勁，上周六喺哥斯達黎加舉行嘅U17女子世界盃決賽，日本憑後衞西田明華同前鋒兒野楓香上下半場各建一功，以2:0擊敗西班牙，首奪呢個賽事嘅冠軍（圖）。
日本隊長、貌似「細哨」朗拿甸奴嘅杉田妃和今仗交白卷，整個賽事累積5個入球，只係排射手榜第3位，好彩拎番個最高榮譽嘅金球獎補數。仍然就讀藤枝順心高校嘅杉田，賽後就話好開心，因為一直冇諗過球隊可以捧盃，甚至打入決賽，不過對自己前途仍然唔敢有太大想頭，只希望一步一步升上U20，有機會先考慮踢職業。同日早場季軍戰，委內瑞拉同意大利激戰4:4，互射12碼意大利以2:0勝出。