《金融時報》可能係在中環街頭隨時買到嘅報紙之中水平最高嘅報紙，金融界人士平日不能不睇，否則何來國際視野？怎麼樣認識今日西方社會？不過老虎都有瞌眼瞓之日。四月一日有一篇記者發自首爾嘅報導，講三星集團嘅高層基本薪水高過蘋果，電子零件部嘅主管年薪連花紅就有六百四十萬美元，但記者居然指Samsung為The Japanese Group，編輯居然睇唔到，照出，咁就笑話啦，一流報紙會發生呢啲低級錯誤，讀者實在莫名其妙。唔好話呢啲屬於愚人節錯誤呀！
《金融時報》去年開始改組新聞報導形式，聲稱加強IT網站之即時新聞，報紙嘅報導會精簡啲，但長篇大論文章仍會在報紙刊出，咁做法顯然係適應潮流，網上報導要搶快、夠多，分析和評論就以文字報紙為平台，希望留住不同年紀嘅讀者，唔好為咗網站就放棄買報紙。
左丁山覺得呢個媒體二分法（網站加報紙）係好自然嘅發展，傳統印刷媒體不追上，就會自取滅亡。乜唔係啫，今時今日仍有報紙標題：「杜指中段升百點」，諸如此類，其實讀者未買到報紙之前，已自智能電話（例如iPhone之Stock）知道晒美國股市收市情況，對報紙如此新聞簡直唔會望一眼，歐洲足球消息又係，凌晨二時四十五分嘅歐聯比賽，六時起床嘅球迷即刻可㩒一㩒電話就知道賽果（例如BBC足球直播），而本地中文報紙要在星期四先至可以報導星期三凌晨嘅賽果。以此為例子，報紙網站嘅即時新聞應有人緊貼歐美股市、球賽，星期三朝早未夠五點就在報紙網站發佈最新消息、資訊，星期四嘅體育版就刊登深入有趣嘅球評，毋須再花篇幅講賽果。依家做網上版確實唔易，尤其是周末好多人放假之時，睇香港電台網站，平時update得幾好，但到咗星期六日，除咗本地新聞之外，其他如財經、體育、國際，新聞更新都幾慢㗎，大概係冇乜人返工啩，總之係成本問題。但呢行係winner takes all嘅，好殘酷，新聞網站如非做得最快最好，收檔係遲早問題。