皇家馬德里陣中差唔多個個球星都有得踢今夏世界盃，但加里夫巴利就斯人獨憔悴，佢代表嘅威爾斯實在太弱，一早已經喺外圍賽出局。不過，冇得踢世界盃又唔使灰，皆因佢今個夏天有望成為皇馬嘅吸金王，冇榮譽但有錢賺，都算係唔錯嘅補償喇！
為掘金，皇馬今個夏天會如常周遊列國踢熱身賽，除咗好似前幾年咁，一定會去美國，同一眾列強競逐國際冠軍盃，今年仲會再展開亞洲之旅，為期一星期，會到訪印尼同新加坡呢兩個東南亞國家。
訪亞洲袋3,200萬
不過，今年係世界盃年，呢班東南亞球迷都預咗睇唔到基斯坦奴朗拿度（C朗）。冇C朗，皇馬今次東南亞之旅嘅頭號球星，仲唔係加里夫巴利。佢就正過班隊友多多聲喇，據聞起碼有成250萬鎊（約3,200萬港紙）宣傳費落袋。去得嗰一星期，到時可能兩、3場波都只係踢半場，然後代表球會出席吓宣傳活動，講幾句門面嘢，夜晚再落下酒吧飲酒，咁就淨袋咁多錢。相比起到時7月尾可能齊腳，遠赴美國同曼聯、國際米蘭同羅馬呢班列強交手，備戰態度認真好多，呢個「吸金王」名銜易賺好多。
拉莫斯疑有小三
夏天之旅係後話，皇馬𠵱家梗係想爭番個西甲或歐聯，到時可以風風光光咁去掘金，但最近隊內就有唔少負面新聞傳出。先係沙治奧拉莫斯俾雜誌踢爆趁正印女友比娜大肚出去偷食，同當地一位女演員有一腿，仲話影到呢位叫Abouk嘅女演員喺拉莫斯住所出現，但𠵱家就未見有相流出。拉莫斯同Abouk都已經即喺Twitter度否認緋聞，堅稱佢哋只係朋友，鬧爆間雜誌社作嘢；但Abouk身材都幾惹火，又無端端會喺拉莫斯住所附近出現，我求大俠就唔多信，但比娜點諗先最緊要。
另外，缺席咗歐聯對多蒙特嘅迪馬利亞，就證實係患咗腸胃炎，兩日內激瘦咗2.5公斤。佢本身已經好瘦啦，𠵱家咪饑民咁款？陰公囉！