【摩星嶺】賭王何鴻燊四太梁安琪、囡囡超盈、超欣同二房兒子何猷龍,趁住噚日清明節,到摩星嶺何家家族墓地昭遠墳場掃墓,盡顯孝心。噚日朝11點半,向來低調嘅猷龍先抵達墳場,並喺山頭多個何家墓地逐個誠心拜祭,之後就獨自離開。
到下晝1點20分,向來快人一步嘅四太率先抵達墓地,一身黑、白色連身短裙潮look拜山,佢一落車就企定定畀記者影相,噚日陽光普照,四太一落車就遮不離身,撐住遮拜祭何家祖先。
四太事忙快閃
相隔10分鐘,四太囡囡超盈同超欣孖公仔坐住七人車抵達,兩姊妹齊齊戴上白色太陽眼鏡、粉色打扮拜山,驟眼睇仲以為係孖生姊妹!同往年一樣,佢哋繼續短打上陣,超盈着住白色上衣配粉紅色短裙,披住藍色外套,露出小纖腰;超欣着住米黃色短褲披粉紅色外套,手挽Givenchy手袋,一向心急兼公務繁重嘅四太唔等埋兩個女,自己拜完就先行離開,兩個囡囡就多留10分鐘左右,問超欣係咪專程返香港拜山?家姐超盈代答:「佢放假。」之後佢哋就微笑同跟大家揮手講bye bye。
克羣認定超蓮
今次拜山未見日前自爆失戀嘅猷君,原來佢噚日零晨喺微博留言,自爆唔小心跌落樓梯:「剛從樓梯摔倒……現在腳太疼,先坐下15分鐘……」
另外,吳克羣自公開同三太陳婉珍囡囡何超蓮拍拖,一直都得各方祝福,噚日就有報道指佢哋拍拖3年,克羣從來冇壓力,仲話自己一向都冇結婚打算,但係佢深愛超蓮,絕對有機會為對方改變,畀超蓮一個名份。
採訪:林嘉慈
攝影:黃偉雄