【曾萌死念】
「如果我冇走出嚟，個女就會俾爸爸打死，我就會跳樓死！」曾與滅門慘案女死者金淑英同住庇護中心的許美琼（圖），早年在廣州一間酒店任職知客時，認識任職中餐經理的港人同事，兩人婚後誕下一女。可惜好景不常，2002年丈夫中風不良於行後脾氣日益暴躁，動輒便將兩母女當「出氣袋」虐打發洩。
03年6月，許持單程證來港一家團聚，卻與淑英一樣，丈夫不准她工作，「都係咁陰功，老公唔准我做嘢，唔准我落樓，有人打電話嚟，佢都要坐埋隔籬聽」。其後丈夫在她熟睡時用鐵鎚襲擊她，幸及時逃離魔掌。
不想女兒失去至親
至04年大年初一，她陪女兒買雪糕時，在商場欄杆徘徊泛起死念，幸眼見愛女歡呼：「媽咪，雪糕呀！」一瞬間她驚悉自己是女兒唯一至親，才打消自殺念頭，其後更獲群福會姊妹支持，走出陰霾並與丈夫離婚，重過新生活。現在她已是群福會中堅分子，她盼淑英的血沒有白流，協助家暴下的婦女。
《蘋果》記者