【無人問津】
「平時呢度有啲拉凳聲，有啲水管滴滴咚咚聲，有時瞓覺會聽到」。居於天恒邨滅門慘案單位樓下的姓林中五男生（圖）表示，多年前搬來後，樓上凶宅經常傳來鐵鎚鑿擊聲及鑽洞聲等異響，最長達一分鐘，連接受訪問當日，他亦稱在下午溫書時聽到怪聲，但已習慣，不再驚恐。
上手租客期滿即走
據稱，凶宅於案發後半年曾有南亞裔單親婦人及三名女兒遷入，但居滿三年符合調遷要求後，即以聽到怪聲為由申請調遷。雖然凶宅已被納入「特快公屋編配計劃」，可享半價租金優惠，但先後推出數十次仍無人問津，至今仍然丟空。
居於凶宅單位同層約三年的巴基斯坦裔住客Hussin Riaz指，當年揀樓時房署曾給凶宅他選擇，惟最後他選住較大的單位，但強調若遷入凶宅亦不擔心：「我唔驚嘅！」元朗區區議員陸頌雄則建議，政府應就此類超級凶宅推出更多超級優惠，如可讓兩人申請單位或將免租期延長，「總好過丟空佢啦」。
《蘋果》記者