被譽為今屆世界盃最大黑馬嘅比利時傳出壞消息，隊中首席前鋒，效力英超球隊阿士東維拉嘅前鋒賓迪基周四喺操練嗰陣跟腱撕裂，需要長唞6個月咁耐，換言之，佢肯定踢唔到兩個月後嘅巴西世界盃，認真慘情！
唞6個月緣盡世盃
維拉領隊林拔話，賓迪基嘅受傷對佢同球會都係一件非常不幸嘅事，希望賓迪基可以盡快好番，下季以更強姿態為維拉上陣咁話喎。但係維拉𠵱家排喺聯賽第12位，爭標冇你份，降班又未輪到你，講驚，比利時國家隊驚過你多多聲啦。
事關呢支綽號「紅魔」嘅年輕球隊，近年出產咗唔少歐洲一流球星，今屆世界盃諗住大展鴻圖，作為國家隊首席前鋒嘅賓迪基責任重大，今季雖然狀態回落咗少少，只係入咗11球，但都係比利時一員大將；點知佢𠵱家傷咗要唞6個月，球隊實力當堂打咗個折扣。好彩仲有盧卡古可以打箭頭，加上夏薩特、奇雲迪布尼等亦可以分擔入球責任。
國腳傷唔停慘情
世界盃越嚟越近，不斷傳出有球星因傷踢唔到世界盃嘅新聞，遠嘅有德國中場基迪拉，呢位效力皇馬嘅球員已經由上年11月傷到𠵱家，但德國教練路維之前都講過仲未放棄選佢入世界盃大軍名單嘅希望。近少少嘅有同樣喺1月頭受傷嘅意大利前鋒基奧斯比羅斯同英格蘭嘅禾確特，羅斯仔話有信心5月可以復出兼操fit狀態踢世界盃，禾仔就冇咁好彩喇，預計要7月先可以好番，肯定無緣世界盃。
巴塞門將域陀華迪斯同法卡奧最近都重傷，但係預計要7月先好得番嘅法卡奧仲好想踢世界盃，話會盡力喺世界盃前復出。咁多球星受傷無緣世界盃，一定係球迷嘅損失，希望其他各大球星都可以健健康康，帶畀我哋一個精采嘅比賽啦！