【中環】賭王何鴻燊四房孻女、現年14歲嘅超欣，曾經獲賭王盛讚，話佢靚到不得了，轉眼已經亭亭玉立，高大過媽咪梁安琪同家姐超盈。一向乖乖女嘅佢前晚陪媽咪，同埋媽咪兩位朋友去咗中環食晚飯，難得係一向少出席成人飯局、現年24歲嘅超盈都有到場。超盈近年已經修心養性好多，好似早排細佬猷君失戀回港，佢專登早啲起身煮早餐畀細佬食安慰佢。
前晚大概8點零鐘，四太同兩位女性友人分別坐住一架七人車同房車到達中環擺花街一幢商業大廈，之後上咗樓上間山下日本菜館。大概15分鐘後就見到超盈同超欣坐七人車嚟會合，因為遲到，兩姊妹一落車已經急急腳行去㩒𨋢。
急步離開
飯一直食到夜晚11點幾至完成，一行5人一齊搭電梯落樓，意猶未盡嘅四太同兩位女性友人行先，繼續邊行邊講，兩位囡囡就殿後。原本戴住眼鏡嘅超欣一出𨋢，已經發現有記者影相，佢即刻以瞬間轉移去暗位，仲邊行邊除眼鏡，過程好似超人Superman變身咁。
變完身嘅超欣出咗門口就急步去搵自己部七人車，可能除咗眼鏡睇唔真，最後要行後面嘅家姐提醒至搵到。兩姊妹上車之後，媽咪都唔等就已經開車走人，而四太上車之後再同朋友寒暄幾句先至離開。
採訪、攝影：徐錦池
