樓市充斥多個負面消息，二手樓價再度受壓，美聯物業新界區董事張子存認為，未來土地供應將穩步增加，新界更是新盤供應倉，加上新盤帶頭減價，令區內不少業主放盤態度軟化，樓價調整成為今年新界區重要契機，有助購買力釋放，成交量正逐漸回升，憧憬小陽春重現。
【個人投資心得】
「做咗咁多年，都未見過有人炒股票發達，炒燶股票輸身家就見唔少。買磚頭係最簡單唔使學嘅投資工具，儲到錢有首期就買樓收租，通常租金都夠供樓，就算摸頂買入，通脹都咁多年，今日都賺番錢啦！物業最終會升值，令你有實際財富。買完一層又一層，他日退休生活亦安樂無憂，甚至可以分埋畀啲仔女。」張子存入行17年，個人投資心得就是最簡單的買磚頭保值，買樓未必可以致富，但至少可為你帶來安穩舒適的退休生活。
至於點揀樓？他認為，「每個地區都有一線位，如果一線位買唔起，咪買二、三線位，入咗場先才有投資，即使最差物業也有租收，供定咗層樓，物業有升值，慢慢三線轉二線，逐級換上去。」40出頭的張子存，坦言已有「幾層樓」揸手，但他謙虛地說，還未供完樓仍需繼續努力。
美聯物業張子存個人檔案
形象磁性包容
年資︰近17年
工作紀錄︰
1997年 物業顧問
2000年 助理營業經理
2002年 營業經理
2003年 助理區域經理
2004年 高級區域經理
2006年 營業董事
2014年 新界區董事
輝煌業績︰
近年贏得多個一手新盤︰瓏門二期、譽88、Yoho Midtown、原築……，覆蓋多種類型市場及顧客群。
今年新界樓價跌10%至15%
「最近大埔白石角地皮流標，反映發展商睇唔好後市，出價保守，新界樓價更加受壓。另外，發展商減價推新盤加埋優惠，甚至低過二手價，加上美國加息，二手業主難免出現悲觀情緒，目前大部份二手業主都有價講，減價幅度由之前2%至3%，擴闊至5%至10%。雖然市場氣氛唔好，但價錢平咗，自然吸引購買力，相信成交反而會上升。」張子存預計，今年新界區樓價將下跌10%至15%。
入市攻略 專吼優質單位
他建議，買家不妨趁機在新界區執平貨，可以吼嘉湖山莊、沙田第一城及映灣園等大型屋苑，通常放盤較多，平盤出現的機會亦較高。「𠵱家買二手樓基本都有5%至10%議價空間，如果撞啱有心急套現嘅內地客或過份悲觀業主，甚至可能傾到1成以上。入市攻略係專吼優質單位，旺市時要畀高一兩成先買到，今日淡市如果有靚貨跌出來，就可以趁機同業主再傾平啲。」
300萬以下二手註冊比率料重上5成
新界樓價調整壓力大，張子存預料在減價氣氛帶動下，區內二手平盤將大增，為準買家帶來入市選擇，今年第一季區內300萬元以內之二手註冊比率更回升至45.4%（見圖），今年有望重上五成水平。
新界區 今年推約萬伙
他指出，近年不少逾千伙大規模項目多集中在區內，新界區一手註冊量佔全港比例經常超過8成水平。今年，估計有機會推出市場的全新新界區項目（不包括愉景灣、西貢及將軍澳），涉及伙數達約萬伙，整體新盤供應佔逾一半，相信未來新界區一手註冊量比例仍會保持高位水平。
新界區料洗淡市頹風
張子存總結，2月政府公布2014至15年度政府賣地計劃中，有22幅土地位於新界區（不包括西貢），佔比重達6成半，顯示新界區供應倉之地位不變，供應高企同時，亦令區內樓價受壓，下調勢成氣候，300萬元以下的二手供應將增加，為用家帶來入市良機。另一方面，由於今年新盤數量不少，預料推盤檔期將非常密集，發展商為爭奪客源，有機會增加優惠，甚至減價促銷，推高一手交投。一二手各有優勢下，購買力將進一步釋放，新界區有望一洗淡市頹風。
《新盤貼士》
揀「一頭一尾」價單
至於買一手樓有沒有貼士？張子存認為應留意發展商的推盤策略。「通常第一張價單係最平最抵買，刺激市場入多啲飛，所以頭一、二浸買會最着數！但如果新盤已經賣咗七成至八成，當發展商決心散貨時，最尾兩、三成單位就會大減價，甚至有可能比起第一張價單更平。所以貼士係揀一頭一尾價單。」
「有大買大」入市良機
在過去數月，新盤中仍以細單位最好賣，張子存分析指，主要原因是市場對細單位需求大，上車客有住屋的急切需要，細單位出租容易，租金回報亦較大單位為高，投資者寧可買兩間細單位收租，總好過買一個大單位放租。
他指出，正因為今年新界區多個主要新盤皆以大單位為主，反而是換樓客一次入市良機。他解釋，雖然現時大單位會較細單位難賣，但由於未來兩三年，供應以2房為主，亦有不少限呎地及限價地落成，估計有七八成新供應都屬於兩房、1房及開放式單位，預期大單位供應少，投資價值會較兩房為高。「長遠都係有大買大，買3房及4房單位，短時間未必有明顯升幅，但將來會跑贏兩房單位。」他稱，今年大部分發展商要「追數」，故仍有條件平賣，是買大單位的黃金機會。