左丁山讀經濟系出身，近日睇葉一堅講及台灣嘅大學經濟系系主任對服貿協議嘅意見，十三位系主任之中，有十二位贊成，覺得好正常啫。經濟學訓練係不以感情用事，做經濟分析，不要涉及私人情緒、情感與個人喜惡。經濟學家用腦袋處事，故此經常俾人鬧到狗血淋頭，話冇良心、冇感情、扮冷酷。葉一堅話台灣學生反服貿，民意調查顯示八成台灣民眾表示政府溝通不足（即是未必一定反對）或反對，即係經濟學家與民眾思維有好大落差，因為服貿係「感情問題」而唔係「經濟問題」喎。
原來台灣人（據堅哥所言）日日駡可恥月薪22K，即新台幣二萬二千元，唔夠港幣六千元，低於香港洗碗女工及大厦看更嘅人工。如果大家甘於捱窮，知足者，貧亦樂，甚為清高，那麼就把任何自由貿易協議，特別係服貿協議踢落台灣海峽好了，何必日日駡可恥月薪呢。面對如此情緒，台灣十二間大學嘅經濟學系主任實在有口難言。
台大經濟系主任鄭秀玲教授係反服貿先鋒，意見明顯與其他十二位系主任不同，左丁山好有興趣知道整個台大經濟系，究竟有幾多位教授贊成或反對服貿呢？講起嚟，左丁山一代新亞書院經濟系學生對台大經濟系頗有感情，當年系內幾位博士講師都係台大學士、德國博士，台大著名嘅老教授張果為（劉泰英、于宗先、錢純等人嘅老師）曾到新亞作訪問教授，開統計學與公共財政兩科，來港一年多，就寫咗一本小書分析香港政府稅收與GDP增長嘅關係，以多元迴歸數式分析香港有無逃稅漏稅嘅事情，其治學之勤，令我地一班香港學生汗顏。佢上堂講書太慢，但下課後與我地談話，呢位七十歲老人就非常投入，我地到佢嘅宿舍（何文田山大夫第）探佢，可以講得不亦樂乎。畢業十年後，左丁山在銀行工作，到台北公幹，果為教授二話不說，請台灣各大公營銀行總經理吃午飯，全部到齊之後，果為師話：「在座各位都係我經濟系學生，丁山年紀雖少，大家幫忙吓佢。」啲總經理望住小伙子左丁山，有啲難以置信，後來左丁山果然得到各位銀行老總不同程度嘅扶持，於是台灣貸款公事發展得幾好，實在對果為師感激不盡。