在審議財政預算案之特別財委會會議上，特首辦主任邱騰華竟然表示冇行會議員出席率資料，公然向立法會講大話，實在匪夷所思，現屆政府體制禮崩樂壞，有目共睹。明顯梁振英係唔想公開行會出席率，有關官員及政務官便砌詞掩飾。
行會出席率必有紀錄
政務官係香港行政主導支柱，百多年來已形成一套核心管治價值，其中一項就係寫會議紀錄。點解咁重要？因為一旦落咗minutes，就白紙黑字有得追、有得跟，入咗file， N年後都可以摷返出嚟追究。
在AO眼中，落minutes代表一種負責問責精神，也代表一種執行承諾，因此會議後傳閱之會議紀錄初稿，AO都金晴火眼睇清楚，有時會為一個用字拗餐飽。
大家唔好睇小英國文官體系中嘅clerk，行政會議秘書叫clerk to ExCo，公務員事務局會選派有潛質嘅中年政務官出任，因為寫行會會議紀錄乃好重要工作，邊啲落，邊啲唔落，全部係政治。
行會成員出席資料乃必然落會議紀錄，clerk to ExCo唔使半個鐘就可統計出席率交比立法會議員，特首辦究竟驚乜嘢？難怪議員懷疑係為低出席率者掩飾。
而最得人驚係在梁管治下，好多重要決定根本唔會落minutes， 甚至唔經表決，大家隨口嗡完，表表態就草草了事。一切決策變成隱蔽政治操作，行政主導下集體決策靜雞雞變咗特首集權一元化領導，會議後特首辦便會致電官員交代政治指示。
過去政務官一套程序，無疑係保守，但功能在於確保政策穩定、延續、冇自相矛盾，重視執行細節，因此經反覆推敲後一落minutes，就放下爭拗全力落實。
現時用一種粗疏、低透明度方式運作，令政務官大為不滿，產生消極抵制情緒。就以騎呢粗疏之「港人港地」政策為例，根本就連一個D2級別AO都知錯漏百出不可行，但梁及其黨羽一意孤行，將一個欠理性之政策大鑼大鼓去推銷，結果一年就收皮。
更荒謬係已賣出之港人港地，目前根本無任何法規去enforce，建成出售後如何監管交易？漏洞多多，規管行政成本高昂，AO人人揞住嘴笑。
梁粉大量呢款「政策大計」未經嚴格程序論證就上馬，再搞多一兩次「港人港地鬧劇」，肯定連成個政府威信都冇埋。
添馬男