睇「堅哥與台灣」（三月三十一日），得知台灣財經雜誌《今周刊》調查十三位台灣的大學經濟系主任對於服貿協議嘅意見，有十二位贊成簽定（92.3%支持率）。剩下一位不知反對還是不答咯，佢會係邊一位呢？來自那一間大學呢？可能係台灣大學經濟系主任鄭秀玲教授啩。鄭教授早在去年七月二十五日已發表一篇PowerPoint式文字「兩岸服貿協議對我國的衝擊分析」，長38頁，引述諾貝爾獎得獎者Joseph Stiglitz（現任教於哥倫比亞大學）嘅觀點及其他因素，強烈建議「政府應立即中止此協議」。
呢篇唔算係學術論文，只係類似一篇大學教授在報刊發佈嘅分析文章，鄭教授筆下之「我國」應係「中華民國」，「中華民國」經濟部部長就公開回應過，指鄭秀玲教授呢篇文章所講與事實不大相符。左丁山粗略睇過鄭教授篇文，對佢講及香港，特別敏感，第3.2段（第26頁）有一條提及：「香港是前車之鑑，香港和中國簽署CEPA後，專業服務人才外流到中國，香港本地增加的是低薪、低技術、低穩定性、高替代性、高流動性的低階低薪服務工作，中階經理與專業僱員的薪資不是倒退，就是停滯不前，這種慘況恐將在台灣重演。」
鄭教授2013年七月發文，引述香港情況，可能係根據2012年及以往嘅數字，其認知與香港人相反。例如2013年5月25日香港統計處發表數字：2013年第一季香港公屋家庭入息同比升了13%（入息中位數達13,500港元），全港家庭每月中位數係22,000元，升5%，人均入息中位數係12,000元（不變）。以今年二月十八日發表嘅數字計，香港家庭收入（2013年12月）在5萬至10萬元以上者，同比升幅超過12%，家庭月入超過10萬元的升幅3.1%，總括而言，香港嘅中階經理與專業僱員的薪資快速上升，怎會停滯不前？鄭教授講香港，水準唔及格噃。台大經濟系素執台灣經濟學術界牛耳，系主任一定係響噹噹人物，但呢位鄭教授引用香港例子，就似乎粗疏些少，香港並無出現佢筆下嘅慘況！