黃曉明連人帶「林寶」送畀Angelababy一幕，相信終會成為年度最震撼的畫面。女人都渴望有自己的Dream Car，如果只能夠買一架車，Samantha一定揀英女皇都揸的Range Rover，貪其高身視野闊，真皮seat位夠高級，最緊要唔使焗屋企人搭的士。話雖如此，要買呢架越野車界Rolls-Royce暫時發下夢好了。
大陸空氣嚴重，限購令和打貪下，實用行先的SUV有錢途，中汽協資料顯示，今年首兩個月，SUV市場產銷增速超過30%，相信將保持高速增長，無論來佬定國產貨都紛紛搶佔這高速增長的市場，Chrysler有意在中國落地生根生產Jeep，而吉利（175）旗下最賣得的SUV，佔總銷量近一成的GX7上月重裝上市，聽聞Volvo有為呢款車提供技術支持，而快將開幕的北京車展，傳吉利發佈6款新車，呢批車料成為新動力。
恒指噚日雖然有得升，逾600隻股下跌呢點不容忽視。揀好股似買車咁，有錢都想買架硬淨啲，吉利有的是實力，該公司在專利申請數量上已超過戴姆勒，另外，受惠產品組合改善，吉利去年純利升三成，純利逾26億元人民幣，調高出廠價亦帶動毛利率升1.6個百分點，業績對辦股價當日即急升15%。恒指氣勢如虹下，吉利近日反而進行整固，圖表上造旗已接近尾聲，快將更上一層樓。
Samantha
本欄逢周一、三、五刊出