踏入四月，又係各大專生搵定暑期工嘅季節。政府近日刊登第一批暑期實習生嘅空缺資料，今年暑期工月薪，劃一價為8,500蚊，同去年一樣。雖然今年有通脹，但係做暑期工有8,500蚊，都算係咁啦，首批空缺今個月14日截止。首批暑期工招聘由投資推廣署打頭陣，五大請人範疇包括資訊科技、廣告及傳訊、旅遊及款待行業投資推廣、公共關係、消費產品行業投資推廣，修讀相關課程嘅大專生會獲優先考慮。但查實就算唔係大專生，亦都有好路數㗎，因政府同時招聘時薪季節性救生員，每個鐘頭69蚊，較去年增加3蚊，增幅4.5%，下周一就截止申請。