啱啱作客完緬甸，穩奪亞協盃16強資格嘅港甲1哥傑志，噚日一早8點落機，傍晚6點就喺香港仔仿真草場操練，備戰聽日作客對晨曦嘅港甲；總領隊伍健（Ken）親臨督操。雖然傑志喺聯賽榜領先緊踢少兩場嘅南華15分，只要南華聽日喺頭場失分，傑志就提前封王，但Ken哥都話明球員唔會放軟手腳，盡力贏晒餘下賽事，以聯賽冠軍慶祝隊長盧均宜榮升老竇。