NBA常規賽進入最後直路，有人竭盡全力希望趕上季後賽尾班車，但亦有人決心擺爛，務求喺選秀大會抽得支好籤。喺周三晚，紐約人主場大炒同市死敵網隊110:81，終於爬到上東岸第8；另一邊廂，湖人作客就以102:107輸畀帝王，錄得今季第50場敗仗。眼見未婚妻兼湖人總裁珍妮畢斯輸到咁，睇怕紐約人總裁積遜都笑唔出。
安東尼無懼地獄賽程
呢場紐約打吡大戰，睇落似友誼波多啲，因為網隊成場都好禮讓，最終俾紐約人大炒29分。唔知係咪因為球隊已經攞到季後賽入場券，網隊教練傑特一於畀班球員唞吓，順便放水畀舊老細，「幫」佢哋殺入季後賽。
賽後傑特話，輸1分同輸100分都一樣係輸，好似唔多在乎戰果咁，回應被罰技犯嗰陣仲笑笑口話純屬意外，唔知仲以為佢贏咗波㖭。
對手送禮，都要自己班球員把握到機會嘅。近期重現最佳第6人風範嘅JR史密夫今場繼續神勇，射入全場最高嘅24分，小添夏達威亦交出17分；而森柏防守都繼續立功，賽後仲俾教練活臣盛讚㖭。隊友終於生性幫到手，自己唔使再孤軍作戰，貢獻23分嘅安東尼賽後就好感慨咁話：「今場勝仗意義重大，而且每位球員都係功臣。」
紐約人贏波，再多得同日鷹隊以92:105輸畀公牛，得以升到上東岸第8位。睇睇餘下賽程，紐約人6場波嘅對手全部都係已入季後賽嘅強敵，不過安東尼仍然好有信心：「全世界都覺得賽程對我哋好不利，但我哋冇得揀，只可以努力去打，控制自己嘅命運。」
傳湖人慳錢唔換迪帥
積遜隊紐約人越打越好，但舊會湖人就越打越沉。雖然佢當初無緣重返湖人救亡，但睇見隊波𠵱家搞成咁，加上話晒都係自己未婚妻嘅球隊，相信佢都唔會好高興。殘陣嘅湖人周三對帝王又輸，今季已經輸咗50場，係班波39年嚟最差嘅戰績；睇嚟湖人存心擺爛，博抽靚籤選秀。
不過，一山還有一山「高」，公鹿同76人太「強勁」，湖人應該只可以爭尾3或者尾4。教練方面，一路以為帥位不保嘅迪安東尼疑似有得留低，最新有傳湖人管理層為咗慳錢下年簽自由身大牌，唔會換新教練喎。