港大新校長馬斐森上任翌日，港大出咗香港大學畢業生議會通訊四月春季號，封面就係馬斐森（圖左）企喺港大本部影咗張插袋相，俾人好自信咁嘅樣。內文話新校長嚟到港大後，主要工作係同內地及其他地區大學合作，仲話世界各地學者都想同港大一齊工作。八方問過港大，校方話會喺未來數月見喎！通訊仲登咗馬斐森開工前一個月，帶埋點心去拜會住喺英國嘅港大首位華人校長黃麗松（圖右），high tea之餘順道取經，摸下港大底蘊。馬斐森對大陸市場咁關心，唔知同新設立嘅副校長（環球事務）有冇關係？呢個新職位主力制訂全球事務策略，進一步開拓港大喺內地嘅學術交流。