編按：是日由盧主席秘書Joycelyn執筆。
落咗幾日雨，胡思亂想：一把遮，可以遮幾多個人？
自己一個唔會濕，兩個人拍住拖親密啲都仲得，三個一定要濕身，四個企定就得、要行就難矣……
雨傘撐開直徑，一米。港鐵計算，一平方米，載客六人。
吓？之前立法會踢爆，運輸及房屋局在議員追問下解開港鐵「載客率」之謎，原來一直是以每平方米可站6個人去計算最高載客量，即係你同我企定定好啦，郁親掂到隔籬，嗰位唔係你落雨擔遮嘅死黨、更不是你女朋友，隨時嗌非禮的。
若改以每平方米「一把遮企4個人」的較寬鬆標準計算基數，來往羅湖至紅磡的東鐵線火車，載客量已是100%飽和！都重未計拖篋。
卡片蘇局長叫你：為咗香港創造就業職位，大家「等多班車」啦！果然是：商務及經濟發展局，我坐商務艙有AM車有司機，話之你坐經濟艙逼死你嘅事。
2013年十一黃金周，香港旅遊業統計酒店訂房下降而入境數字依樣上升：「自由行」有65%不住酒店即日來回、買貨即走，再唔係可以瞓麥記，露營沙灘郊野公園。
其實「自由客」大可以駐紮添馬艦那大草坪，交通四通八達超方便、維港景致壯麗、保安自是一流，況且，香港最好客的官員全在咫尺，惟記得要帶「愛國」橫額和國旗以示主權。
政府的《香港承受及接待旅客能力評估報告》，過去十年間訪港旅客增加豈止逾倍，而當中的內地「個人遊」更由4百多萬急增至2,300萬人，佔總訪港旅客人數比例亦由兩成增至幾近一半。
而越來越多拖篋自由行，於是乎同期港鐵總乘客人次，亦由10.89億人次增加至14.31億人次，增幅超過三成，相對同期本港人口增長的5.46%，足足多五倍！
所以並非自然的人口增長， 而係那2,000多萬的「遊人」、相當於香港700萬人口三倍有多的「非常住人口」逼爆港鐵和香港。而去年平均每個香港人要「招呼」三個「內地同胞」、一個四口之家就要「接待」12個大陸訪客！問你點頂？
港鐵增班次 作用有限
為咗安撫大家，港鐵隨後宣佈，往返深圳的100% fully-loaded東鐵線將會「每星期增加58班次」，包括：周一至五下午6時至8時，每日增加2班次，即係加得嗰一程來回，而周末兩日加48班，即係一日加12程來回，一個鐘多唔到一班，oh so sad。
香港人，惟有繼續「忍多班車」，一面聽港鐵話要「右上左落」加快上落車。若然每列火車只限一卡「拖篋專卡」，我包你拖篋排隊頂番上羅湖橋！
一面又聽見民建聯嘅「顧問建議」要加強巴士路線接駁市區，疏導乘客咁話：唔知啲巴士，會行獅子山定大老山隧道呢？好塞車下噃。
就係唔知點解，自由行一個都不能減？我把遮，真係好逼！
Joycelyn