公民黨為慶祝創黨八周年，11號會搞黨慶晚宴籌款，噚日將黨總部變身畫廊，向傳媒介紹將用嚟拍賣、由多位名人捐出嘅畫作，包括前政務司司長陳太捐出媽媽方召麐嘅畫作《秋景》，另一位前政務司司長唐唐連續第二年捐出六支Magnum紅酒，壹傳媒主席黎智英則捐出著名畫家丁雄泉嘅《採花大盜》，另有支持者捐出全新Hermès手袋。
袋巾開金口獻唱
書法了得嘅黨主席余若薇，除咗會將寫有高登潮語「世事都被你看透了」等書法作品、當日仲會大賣「冰淇淋」。大家咪諗歪，據黨魁袋巾透露，余大狀上周二已喺黨總部綵排整雪糕，過程用咗半個鐘，絕對有睇頭，笑指「我就即席食咗，𠵱家仲健在，肯定冇事」。黨慶撞正立法會11號飛去上海訪問，袋巾話佢同特別來賓自由黨黨魁田大少，喺12日朝先加入，三名公民黨議員郭家麒、郭榮鏗同湯家驊就如期出發。
公民黨當晚仲請咗前商台主持李慧玲、港視高級編導蔡錦源等出席，由袋巾獻唱一曲表揚佢哋「不認命，站出來」嘅精神。
mailto:[email protected]