上月中先至卸任太古系主席嘅白紀圖，轉個頭已經有新動向，佢唔係搵到份新工作，而係走去幫汪穗中旗下德昌電機（179）做獨立非執董，即日生效，一年袍金2萬美元（約15.6萬港元），仲可以每年獲發相當於6,000美元嘅德昌股份。
白紀圖喺太古集團工作超過35年，上月last day時透露，卸任後將會離開香港一年，返英國修讀藝術史，然後先至再搵新工，仲有機會返來香港㖭㗎。估唔到白紀圖真係咁唔捨得香港，暫別都要做德昌獨董。其實佢今年先至57歲，唔算係老，真係唔使咁早退休。
白紀圖上手嘅太古系主席唐寶麟亦都係不甘寂寞，唔做主席之後，冇耐做太平洋航運（2343）獨董，2008年轉埋做執行主席，並先後兼任金沙中國（1928）同埋九龍倉（004）嘅獨董。