稻香（573）每年3、4月都會推出「一蚊雞」，舊年賣到唔夠賣，要提前腰斬。行政總裁梁耀進（Eric）透露，舊年一蚊雞銷量按年增三成，完全超出預計，今年已準備每日1萬隻雞，應該夠賣。為咗令大家唔好做大嘥鬼，公司亦會鼓勵客人叫半隻雞。
Eric話，以往有顧客每碟雞只食雞髀、雞翼，剩低其他部份，真係幾浪費。因此，公司今年會加強推廣「五毫子」半隻雞，又跟社企「惜食堂」合作，如果埋單時，每人消費喺半隻雞以內嘅話（例如四個人叫兩隻雞），會獲送優惠券，每張單又捐一蚊畀惜食堂。一蚊雞上月28日已經推出，為期三星期。往年一蚊雞跟「秋官效應」齊名，一推出，股市就冇乜運行。上月底港股急跌，雖然近日升番唔少，但係大家都係要留意吓嘞。