東華三院董事局前日換屆，施榮恆（Ivan）接三太陳婉珍做新一任主席。Ivan笑稱做主席之前，已經被唔少人點錯相叫佢做施會長，原來好多人認錯佢係現為廠商會會長嘅二佬施榮懷。
施家前晚總動員出席就職晚宴賀Ivan，四公子一齊現身，相信唔少人都趁機望真呢班兄弟嘅真身。嚟捧場嘅唐媽媽唐尤淑圻滿場飛，high爆嘅佢不斷encore威士忌。
要數最令Ivan上心嘅東華事務，非推動社企莫屬。東華設立嘅「iBakery愛烘焙麵包工房」越做越成功，Ivan任內仲想開設烘焙工場，除咗令生產過程更具成本效益，亦想喺工場內設培訓中心，為殘疾人士提供烘焙訓練。廣華醫院重建計劃大綱草圖今年亦落實，加上要擴展社區牙科服務，睇怕Ivan有排忙。