公司生意好唔好確實影響高層嘅花紅，國泰航空（293）最新年報顯示，𠵱家升咗做主席嘅前行政總裁史樂山，舊年總薪酬1,380萬元，較2012年減少12%，主要係花紅縮水18%，只得384萬元。
國泰嘅年報寫得比較清楚，董事舊年收取嘅花紅跟前一年嘅工作表現有關，受到貨運生意疲弱與油價成本急增影響，國泰2012年純利大幅下挫84%，史樂山當時係行政總裁，當然責無旁貸，舊年分少兩成花紅都好應該。
今年升做行政總裁嘅朱國樑，花紅亦減少5%，但佢基本薪金增加咗，令舊年總薪酬有得加，升8.6%，袋614萬元。國泰舊年純利彈升兩倍，花紅一定加唔少，再加上史樂山與朱國樑今年齊升一級，兩人今年份糧應該豐厚好多。