距離2017年特首選舉尚有3年，但如果要參選特首，就係時間熱定身嘞！被視為熱門人選的前財政司司長梁錦松雖然未話去馬，之但係佢嘅形象工程卻已悄悄展開。八方發現，阿松近排幾乎每月一講座，由講耶穌傳福音，到談經濟論中產，以至同青年對話講世界大事，題目同對象，刺中狼英最弱嗰幾環，唔通提早熱定身，想嚇退得嗰689票嘅狼英？
頻頻開talk做嘉賓
阿松繼上月出席政改論壇指2017年無普選香港或覆舟、以及去埋回收廚餘活動撐場後，繼續四出巡遊爭曝光。上周六，佢喺機場博覽館做見證傳福音，題目係「精彩人生」，國粹派出身嘅阿松，匆匆上台落台兼娶埋伏明霞，𠵱家仲傳佢選特首，由佢嚟講人生，梗係精采。
阿松絕非只識講耶穌㗎，今個月23號，佢會到教育學院演講，題目係「給年青人的錦囊」，教年輕人點面對全球化衝擊；下個月5月15日，阿松就應中大商學院邀請，主講「香港經濟與就業前景之我見」；過咗暑假，阿松更會喺9月到港大為「青年領袖教室」講「中產崛起」。
阿松選擇喺距離特首選舉還有3年之際，四出做「講座嘉賓」，仲就住狼英最弱嘅經濟、年輕人、中產，甚至狼振英冇嘅信仰入手，點只口痕咁簡單？想當年，狼英凸個頭出嚟想參選時，不但出席唔少論壇、更喺報章地盤撰文大談見解，唔通阿松都係有樣學樣？
雖然有傳阿松只不過係「掩護」，目的係凝聚商界支持，等住2017年齊齊支持商界推薦嘅真命天子，但無論如何，阿松嘅落力度足以嚇窒唔少梁粉，否則點會咁啱會有中央挺狼英連任消息傳出呢？
mailto:[email protected]