阿里巴巴「點石成金」的效應失靈，周一宣佈投資百貨股銀泰（1833），但銀泰最後竟倒跌收場，打爛咗阿里個金漆招牌。今次阿里和銀泰組合營公司搞O2O（Online-to-Offline），聞說當日分析員會議上群情洶湧，大家不停追問呢檔嘢的盈利模式，但都不得要領。
其實所謂O2O，主要是透過線上平台提供資訊，帶動人流去返實體店，然後再收集客戶數據（例如你喺百貨店內用佢個wifi，咁公司就可以收集到你在店內shopping的移動路徑），經過分析後，再利用線上平台向顧客推銷返適合佢嘅產品，如是者形成一個循環。
今次銀泰呢個合營，雙方的重點，可能就係想要那堆數據，以提升彼此的銷售效率，揸盡每個消費者的購物潛力。但呢一招，講到尾只是配合你現有嘅零售業務，大前提係你本身盤貨要有競爭力。你提供嘅品牌夠唔夠勁？價錢係咪合理？如果呢啲問題本身未解決，搞O2O都係無謂。姑勿論有冇實質成效，對銀泰來講，呢單deal可以讓佢用平息抽到水，以支持佢繼續開店；而且有阿里的估值撐住，銀泰分分鐘有re-rated的可能。至於阿里，由於其投資主要是透過CB進行，可謂立於不敗之地，咪當係買一個機會。芬佬朋友說得好，其實馬雲搞咁多deal，都係想「集郵」箒，你話佢有冇深思熟慮、諗定條絕世好橋先出手？可以肯定話你聽：冇囉。
海迪