高登文學代表作之一《那夜凌晨，我坐上了旺角開往大埔的紅VAN》，由陳果拍成電影即將公映，導演接受本報訪問，表示電影帶出一個訊息：最恐怖唔係外星鬼怪，而係呢個城市嘅人同事，已經唔再熟悉，《紅VAN》故事反映梁振英上台後，短短兩年變質走樣。內容講述主角阿池某夜凌晨乘坐旺角前往大埔的紅色小巴，穿過獅子山隧道後，發現世上所有人及汽車竟突然消失，剩下小巴及車內17人留在無人無車的大埔，但後來又出現來歷不明的神秘面具人，以及小巴上的17人部份無故死亡。車上17人各懷鬼胎、惶恐不堪，紅VAN被視為香港今日深紅特首管治下之政治隱喻。
黑白道挺梁維穩
自梁當選翌日往西環高調謝票後開始，香港一夜走樣，古靈精怪政治勢力抬頭，黑道人馬公然介入政治，選舉提名時幫梁拉票，之後參加挺梁遊行，梁落區則派出大批古惑仔護航，公然在警察面前毆打反梁示威者。黑道囂張，白道則變面，警察介入政治成為打手，參加建制勢力聲討林慧思集會，毫不避嫌，處長及保安局長噤聲。社會湧現一班紅衞兵愛字頭團體，以搗亂作手段旨在同泛民攬炒。
傳媒不斷受政治勢力整治，一個一個資深傳媒人被重點「斬頭式」清除，包括《信報》、《明報》、商台，對付《am730》、《蘋果》則用抽廣告方式，包括出動梁特首杯葛渣打馬拉松，逼外資企業就範封殺《蘋果》。最後令人震驚係劉進圖光天化日下畀黑道刀手行刑式斬至重傷。而跟手批鬥鍾庭耀按劇本在兩會期間公演，冇因劉進圖被斬而有所顧忌，相信下一波對付香港學術界已殺到埋身。更古怪係梁振英女兒與警務處長曾偉雄不約而同否定事件涉新聞自由，警方明知黑幫涉及協助買兇斬人，一個月下來砵蘭街照樣燈火通明，馬檻照常營業。
所有事都唔係個別事件，因為背後涉及同一個目標：「維穩」。梁民望越低，維穩之手越猖狂，兩年下來，香港由英治時代建立之現代政治文明，由粗暴、落後之維穩勢力取而代之。猶如穿過獅子山隧道，一剎那香港變了另一個異形世界。
台灣太陽花學運最值得港人吸取教訓，唔係學林飛帆、陳為廷，而係留意黑道竹聯幫大佬「白狼」張安樂，成立親共組織中華統一促進黨回台灣活動，佢發起千人挺服貿，更站在活動宣傳車上與警方封鎖線後的民眾對罵。呢種手法同香港黑道近年介入政治何其相似，即係話香港一旦爆發佔中，率先對付佔領群眾唔係曾偉雄帶領之特區警察，而係香港黑道、古惑仔，猶如當日梁振英天水圍落區之重演。
台灣人堅決拒絕登上開往內地之紅VAN，香港人則以為架紅VAN真係去大埔，點知一落車，已經過咗皇崗，懵仔！
添馬男