澳門未來幾年有好多新賭場同酒店落成，幾個賭場都要諗計搶人，新濠博亞（6883）行政總裁何猷龍接受《彭博》訪問時就開出條件，除畀出具競爭力嘅薪金，亦會為員工子女提供獎學金計劃，務求為明年中落成嘅新濠影滙（Studio City Macao）吸納8,000名員工。
永利（1128）為留人，上月底宣佈年中增加一個月花紅，兼派1,000股畀員工。何猷龍除咗出錢，仲關心員工發展，講明提供管理培訓，並為員工子女提供獎學金計劃。澳博（880）暫時好似唔急搶人，行政總裁蘇樹輝認為，送股畀員工「搶壞市場，唔係好事」，至於澳博夠唔夠人用，佢就好老定咁話，未來咁多畢業生加入職場，請人壓力唔大。
事實上，除咗新濠影滙、永利皇宮之外，銀娛（027）旗下銀河二期亦會喺明年初落成，應該好快開始搶人了。