商台炒咗李慧玲之後，人事變動原來仲未完。噚日商台發新聞稿，公佈會同《在晴朗的一天出發》嘅前任主持黃永嘅「言論自由行」合作，喺《左右大局》時段做一個全新政論節目《人民大道中》；至於《左右》主持黃潔慧就調去《晴朗》同陳志雲一齊做節目。
八方聽聞黃永強勢回歸，背後係商台副主席俞琤親自「欽點」，大家真係估佢唔到，事關當日陳志雲入主商台，據聞獲俞琤默許將黃永由《晴朗》踢走，𠵱家又係俞琤將黃永拉返入商台，果然真係冇永遠嘅敵人！八方估計最冇癮一定係志雲大師，當日俾自己踢走嘅人，老闆突然又搵返嚟委以重任，唔知志雲大師又會點拆呢？