英格蘭國家隊領隊鶴臣真係五時花六時變，2月尾先至話准班三獅兵帶埋老婆女友（WAGs）去邁阿密進行世盃前最後集訓，日前又改變主意，嚴禁帶埋班WAGs一齊去。鶴臣咁做都啱嘅，家陣英軍去備戰而唔係去玩，冇理由畀班友仔帶埋啲女嚟梳乎啫！
如果曼聯或車路士入唔到今屆歐聯決賽（5月24日），三獅兵團會喺英足盃決賽（5月17日）之後，就可以開始備戰6月12日喺巴西展開嘅世盃決賽周。消息話，英軍先會喺5月19日至23日去葡萄牙嘅阿爾加夫集訓4日，之後返英國並喺5月30日主場約戰秘魯，踢完呢場友賽之後就拉隊去美國邁阿密進行最後集訓同住喺文華東方酒店，期間喺6月4日同埋7日分別友賽厄瓜多爾同洪都拉斯，然後就會飛去里約熱內盧出戰世盃決賽周。
想球員專心備戰
鶴臣原本畀班國腳嘅WAGs，如朗尼老婆高蓮、基斯史摩寧女友曲姬同湯卡華利女友祖芝娜等去葡萄牙同美國，但佢諗諗吓唔係好對路，於是突然出禁令，唔准班三獅兵帶埋老婆同女友去邁阿密，不過英足總講明，如果班WAGs係自費飛去邁阿密，佢哋亦冇權阻止，總之淨係包佢哋去葡萄牙，冇包埋美國個trip啦！
鶴臣喺2月尾曾經咁講：「我同班球員講，佢哋嘅老婆女友都可以嚟邁阿密。」但消息人士話，鶴臣諗過度過之後，想班球員喺邁阿密作最後衝刺，如果WAGs都嚟埋或會搞到佢哋分心；同埋佢都知邁阿密多嘢玩，擔心班WAGs會喪蒲出事。家陣佢落柯打唔畀班WAGs嚟，萬一咁唔好彩英軍喺世盃決賽周表現好差，英國啲傳媒都唔可以用WAGs呢個point嚟插佢。
謝四反對WAGs隨隊
查實英格蘭國家隊隊長謝拉特上月尾都表態話唔贊成WAGs跟球隊去集訓或踢世盃決賽周，認為咁做會令佢哋唔可以專心比賽。謝四斬腳靚波畀鶴臣，鶴臣冇理由咁蠢，仲將WAGs呢個計時炸彈放上身啫。