前日突然傳出科大推出情侶雙人宿舍，網民大讚科大走在時代最尖端。話說有同學話「聽聞」校方容許部份宿舍改做雙人房，安排唔同性別同學入住，話係照顧唔同宿生需要，仲「爆料」話學生事務處處長阮太（Pandora）係幕後推手！據放風人「透露」，雙人床會先喺一座二樓男女層引入，若反應理想會加推到其他宿舍，但收幾錢就未知。
咁爆嘅新聞，八方梗係想追訪科大，點知校方回應呢件事係假嘅，根本就冇雙人床呢個安排，似乎係愚人節呈獻咋噃。但八方問過啲學生，有同學仔話有啲情侶同學，會自己搬床兼互調房間，舍監對自製雙人房唔干涉。又幾開放喎！