話說高明噚日買咗個日本卷蛋糕番公司，於是菲菲親自操刀，將個蛋糕切得靚靚同公司眾人開心share。可惜派餅之際，被眾人諸多挑剔，嫌棄個餅切得樣衰，「點解切到成排ribs咁」。可幸仲有真朋友唐牛欣賞。唓！女人切餅叻有咩用？理財叻先有用！
港女理財全亞洲最叻
噚日MasterCard發表調查，發現香港女性喺生活幾個範疇上，於「工作與財務」方面最具自信，有成70分咁多。其中，港女覺得自己人生入面，最有信心做到嘅分別係「按時付賬」（78.8分）以及「為巨額消費儲蓄」（78.7分），後者個分數，不單遠高於區內平均數（54.1），更高踞亞太區之首。以前唔少人都批評港女大使、拜金，今次可算係「有數有真相」，證明唔少港女於處理財務係有一手。試問下，如果你娶咗個老婆番屋企，佢一個人幫你plan晒，準時交齊水、電、煤、卡數，仲可以逼你交家用，落實儲蓄大計，咩都唔使男人煩，你話幾開心！呢份報告解釋咗港女喺呢方面係全亞洲最叻！
不過要真正儲到錢，一蚊一蚊咁儲效率太低，要儲就要好似個卷蛋糕咁，越滾越大。會德豐（020）近期見底回升，交投配合，留意短期內會唔會突破降軌，升破32.9元，屆時一博或可將舊錢碌大佢。
Fifi
本欄逢周二、四刊出