金融大鱷索羅斯同佢位巴西演員前女友費雷爾（Adriana Ferreyr）嘅風流賬，真係計來計去都未計完。費雷爾2011年入禀向索羅斯索償5,000萬美元，本周二被法官駁回；不過，佢控告索羅斯打佢嘅案件，就仲未斷尾。
費雷爾話，索羅斯原本應承送一個位於曼克頓嘅單位畀佢，個單位值成200萬美元，點知索羅斯反口冇送，仲轉送咗畀現任老婆Tamiko Bolton。費雷爾於是入稟追討詐騙損害、情緒憂慮等等嘅補償，不過法官認為，冇證據顯示費雷爾因索羅斯反口而受極大傷害，所以駁回指控。
不過費雷爾同時指控索羅斯打佢，叉住佢條頸，法官就未駁回有關指控。當時有警察被召喚到場，冇拘捕任何人。索羅斯嘅律師就話，有信心其他指控都會好快被駁回咁話。