退出江湖嘅教育局前局長「孫公」孫明揚，噚日俾八方喺瑪麗醫院門口撞到正。早前出席過講座，大談量子力學與政治嘅孫公透露，患有腎病嘅佢，𠵱家隔日就要去瑪麗醫院洗血（血液透析排毒），一洗就五個鐘，每次朝早六點就會由孫太做柴可夫司機，接送去瑪麗醫院，中午12點幾接番佢。
咁孫公生活一定好有規律啦？事實又唔係喎。佢話呢排最關心嘅係英超，噚日凌晨就睇埋曼聯對拜仁先瞓。瞓咁少對身體有冇影響？孫公話「邊瞓得咁多」。八方同行家都好想知，佢有冇留意接班人吳得掂呢？耍太極了得嘅孫公回敬一句：「老婆嚟啦」，快步上咗七人車，太極功冇生疏。