左丁山信奉「工作時工作，遊戲時遊戲」嘅人生戒條，星期一至五，每日早出晚歸，經常每星期日日見到同一個大廈看更──返夜班嘅看更，早上出門時佢未放工，晚上回家時，佢已經當值坐響度，如此捱法，自己有時都覺得不可思議，有老友問：「退休後，你點樣打發時間」？
咁又唔怕噃，好似上星期六咁，夜晚八點半以後就有足球比賽轉播，係英超曼聯對阿士東維拉，十點幾就有轉播杜拜賽馬，十一點開始英超大戰連場，一點半係阿仙奴大戰曼城，兩點零幾分有杜拜世界盃，揸住遙控轉台，一路睇到凌晨三點先至上床，六小時後就起身，快快趣睇完六張報紙，就換衫去沙田馬場，參加「中文大學校友會聯會盃」賽，到賽馬會吃自助餐。
今年「中大盃」（簡稱）多得聯合校友游應森贊助部份費用，人人讚好兼多謝，不過游校友極少跑馬，全日坐響度，純粹捧母校場啫噃，中大校友評議會主席陳志新校友有隻「中華寶貝」（新自購馬）參加第七場嘅中大盃，有校友問：「如果陳主席贏馬捧盃，豈非好應景？」左丁山就話「未得住，隻馬太新，有些少脾氣，落注不能感情用事，呢場係大法官李國能隻1號勁勢最有機會，杜利萊從杜拜趕返嚟騎5號仁仁有福，必然搏殺，呢場係1，5單Q」。
時屆，在沙圈與大法官握手預祝佢捧盃，佢笑而不言，似有期望，但亦有啲多緊張之色。開跑嘞，勁勢與仁仁有福鬥足半途直路，卒之勁勢贏咗短馬頭。一位校友P先生即刻拎出一叠飛嚟俾左丁山睇，就係買勁勢獨贏，1，5單Q，雖然派彩甚低，佢話全日買一場已贏夠是日使費。賽後由中大署理校長程伯中教授頒獎，李國能係中大榮譽博士，亦算係校友，中大校友捧番中大盃，恭喜晒。講番轉頭，信左丁山所謂貼士贏錢嘅P先生，說來有一段幾十年情緣，P先生嘅爺爺係左丁山嘅英文老師，左丁山嘅新抱就係P先生公子之英文老師，左丁山多謝P爺爺之教導，P先生就代表兒子多謝左丁山媳婦之教導，世事真奇妙也。