星期三亞冠盃第4輪分組賽，G組FC廣州（廣州恒大）作客再鬥南韓球隊全北汽車，只要贏波就有機會提早出線，點知臨天光出事，踢多個人情況下失波以0:1落敗。恒大喺今屆亞冠分組賽不敗之身被破，出線形勢一下子緊湊晒。
恒大教練納比賽前話唔太在意係咪可以喺呢場波提早晉級，不過排陣上都唔算保守，鋒線由迪亞文迪夥拍郜林同艾傑臣，組成三叉戟進攻；傷癒冇耐嘅穆里奇就先被列為後備。恒大喺上月中主場迎戰全北以3:1輕鬆贏波，今場波去到對手地頭，上半場節奏都幾快，最有威脅係喺37分鐘，全北開角球由老將李東國頭槌攻門中楣唔入，完半場互無紀錄。
榜首榜尾差3分
到下半場19分鐘主隊中場鄭赫領紅被逐，點知踢多個人竟然先失守。全北喺76分鐘靠一次快攻打破僵局，巴西外援李安納度接應長傳，球不着地一射入網，奠定1:0勝局。
同組另一場波橫濱水手主場迎戰澳職嘅墨爾本勝利，雖然先失守但好快就追番兩球，最終以3:2反勝對手。水手終於開齋追到同恒大只係相差3分，邊隊出線都仲有價講。
另一支中超球隊一樣抗韓失敗，E組FC山東主場2:4輸畀浦項制鐵。