變臉變到去7.0版嘅𡃁模謝芷蕙（Cammi），日前自爆喺眼做吊針，但點都否認整容，19歲嘅佢自從跟陳冠希分手後，馬上泊得好碼頭，吊到大佢兩歲嘅富二代男友B先生，Cammi樂得做貼身膏藥黐到實。
影咗五個鐘
入行四年嘅Cammi享受做紙上明星，雖然有出席公開場合，但不時貼相上網保人氣，最近佢就跟同門𡃁模Kam Kam俾一間自拍館睇中，袋咗五位數字齊做代言人。
Cammi同Kam Kam喺自拍館裏面唔同主題房進行拍攝，佢哋仲玩cosplay，Cammi除咗扮短裙學生妹，仲有小丸子同着小紅斗篷，Cammi今次冇再用自拍神器，所以臉容睇落去真實好多。相中Cammi當然利用佢整咗雙眼皮嘅一對電眼向鏡頭發放電力，佢噚日喺電話話：「呢次影廣告相換咗好多衫，拍咗五個鐘，感覺好似影寫真咁。」Cammi話𠵱家𡃁模out咗，所以今年夏天都唔打算再出寫真。問到Cammi認咗割雙眼皮，怕唔怕成日俾人留意對眼，佢話：「我唔想再講，怕大家以為我拎嚟宣傳。」
撰文：馮仁昭