碧桂園（2007）財務總監（CFO）伍綺琴兩星期前忽然話唔撈，由於佢之前做過港交所（388）同埋恒隆地產（101）高層，並非等閒之輩，無端端辭職，所以惹來跳船疑雲，拖累碧桂園即日插水12%。
不過股民係善忘嘅，碧桂園噚日宣佈搵來中國海外（688）前CFO吳建斌接替伍綺琴，股民見公司搵到藍籌前高層，刺激公司股價彈升8%。
吳建斌2002年任中國海外CFO，2009年調任為非執行副主席，加入碧桂園之前，係中國海外集團副總經理，佢今年先至51歲，絕對有條件跳槽再搏殺。
根據協議，吳建斌基本年薪500萬人仔，仲有花紅分。佢本身亦睇好呢間公司，持有300萬股，以噚日收市價計算，市值超過1,100萬元。今次股東變員工，佢嘅工作表現都會影響到個人身家喎。