陳法拉同內地真人騷《爸爸去哪兒》爆紅男模張亮等噚日喺又一城出席STACCATO時裝騷。之前香港落雹又黑雨，搞到又一城變咗水舞間，活動喺另一邊舉行，所以冇影響，不過法拉話嚟之前好驚，第一時間問同事會唔會取消，佢話：「見到已經回復正常，效率都好高，不過我睇到個男仔喺商場地下玩水，嗰啲原來係污水，唔係雨水。」
首次嚟香港嘅張亮獲半百粉絲撐場，佢話：「想不到有這麼多粉絲，希望之後再多一點，真的很感動，給了我很大驚喜。」
張亮孖囝囝拍劇
張亮話囝囝因為要返學，所以冇嚟，又話如果有合適劇本，唔阻礙返學，可以考慮同囝囝一齊拍戲。講到已婚文章被爆有小三，張亮話知道，呢啲係家庭內部事情，佢會有自己解決方法，希望盡快回歸正常工作同生活，問對佢有冇警惕？佢話對每個人都有。訪問後，張亮離開時俾大批粉絲圍實，引嚟小混亂，仲搞到佢行錯路要折返㖭。
撰文：馮仁昭
