港交所（388）行政總裁李小加自從四年前上任後，集團高層就好似車輪轉咁轉完又轉。當中，57歲嘅葛卓豪（Gerald Greiner）可以話感受最深，雖然佢一直未被轉出港交所，但佢喺公司裏面轉完又轉，舊年初被削權轉職後，啱啱又被升上「神枱位」。
葛卓豪前年仲係營運總裁，舊年初被調去做結算業務環球主管，噚日再被執位，變為結算及監管事務顧問主席，名義上好似矜貴咗，但實際權力就交咗畀戴志堅同冼博能（Trevor Spanner），兩位齊齊出任環球結算業務主管，兼直接向李小加滙報。
不過，唔好以為葛卓豪少咗嘢做，佢除咗要做顧問，同時出任集團合規事務總監，身兼兩職不特止，以後佢仲要多咗集團監管事務總監戴林瀚（David Graham）呢位老細睇住佢。