內地果汁生產商滙源（1886）於2008年想賣盤畀可口可樂，最終商務部以壟斷為由否決單刁，搞到老闆朱新禮賣豬不成（佢當時話將企業當仔養，當豬賣）。六年過去，佢就搵番位做過可口可樂同埋百事可樂嘅梁家祥（Kerswick）做高級副總裁。
梁家祥喺加拿大曼尼托巴大學畢業，修讀微生物學與食品科學專業，曾經先後任職可口可樂（中國）15年、百事可樂（中國）16年，確實係經驗豐富。佢加入滙源後，將會專責生產與營運，控制生產成本，加強產品品質。
滙源老闆朱新禮上個月現身業績會時，豪言要招兵買馬，未來陸續仲有併購擴張計劃，估唔到轉頭即刻請一位做過兩間可樂公司嘅梁家祥。滙源舊年被指用腐爛變質水果生產，公司隨即否認，𠵱家再搵梁家祥睇實生產都合理嘅。