「大家無謂再呃自己話出面一切係正常」、「香港已經唔係香港」……改編自高登人氣網絡小說《那夜凌晨，我坐上了旺角開往大埔的紅VAN》，未正式上映已備受矚目，一句「還我香港」，霸氣盡現。凡此種種，連執導的陳果，都嘖嘖稱奇，「香港人真係太鬱悶」。人人忙不及找他代言，倒是背負大眾期望的草根大導最老實：我希望回本，有錢拍埋個下集！
陳果的電影寫實，愛以草根小人物為主角。九七三部曲，寫盡回歸前後，香港人面對前途未卜的集體迷惘；《紅VAN》寫香港一夜間變異，留下車上17人困城自救。人心難測，應團結，卻又各懷鬼胎：置身度外的神婆、解謎的電腦達人，似迷失卻又清醒的白粉仔……任達華的角色，他笑說就有特首梁振英的影子：「曾經威過，冇咩能力但鍾意講到自己好有能力，咩都死撐，都係好典型嘅香港人。」他哈哈大笑。
政治諷喻冇包袱
對於政治諷喻，陳果說沒有包袱，「今日嘅觀眾進步咗，唔再係好似以前咁，一見到政治社會議題，就嗌唔識唔想理，好似政改，係今日好多香港人關注嘅課題，所謂嘅金句，只係反映社會現實，同社會發展同步，容易引起共鳴」。由爭取普選到訴說供樓之苦，刻下都是港人心聲，「就好似李嘉誠話有能力嘅人唔想做、冇能力嘅人爭住做，一樣引起共鳴」。
如有機會開拍下集，他會考慮加入中港商人角色，「返大陸做生意，以為可以發達，但結果俾人呃晒啲錢。香港，好多呢種人」。開台無期的王維基，正是一例。「最恐怖唔係外星鬼怪，而係呢個城市嘅人同事，已經唔再熟悉。」電影的結局，紅VAN衝出大埔，是否走出困局？陳果說「唔知」，就像那架迷失在平衡時空的紅VAN，要看各人造化。
大銀幕下的迷離境界觸目驚心，目下的香港，也出現「變異」。只是，陳果並不悲觀，直言從未見過香港人像今日的關心社會，「《香港製造》拍九七回歸嘅迷惘心情，呢啲社會議題，好多人覺得唔關我事，只有搞移民嗰啲中產關心，十幾年間嘅社會變化，年輕人關心政治，代表社會進步，一定係好事」。
陳果說電影引發的巨大迴響，都令他感意外，「預咗套戲入唔到大陸市場，好多謝仍有老闆咁儍，肯投資，我當然希望唔好令佢蝕錢。」
記者 呂麗嬋
