美國朋友一年一度來港睇欖球，到陸羽飲茶，順便提起馬航MH370一事，佢話美國收費電視（CNN與霍士）講到好詳盡，但缺乏事實根據，各方專家講咗接近兩星期，乜理論都講晒，已經講到無以為繼，到馬來西亞總理親自宣佈MH370班機已在西印度洋墜毀之後，電視台唯有草草收兵。此事之引起美國媒體關注，主要係事件神秘莫測，刺激起航空界、科學家、情報界、反恐機構及大眾嘅好奇心，但因為班機上只有一位美國人（一說有三位），美國政府表面上並不太緊張。左丁山感慨而言：「假如機上有二分一至三分二乘客係美國人，咁又如何？」美國朋友話：「唔識答。」
都係靠估啫，如果機上乘客以美國人為主，相信美國第七艦隊會出動去印度洋，配合潛艇及太空衞星，全面性搜索都似，兼且美國政府一定向馬來西亞施壓，要政府盡早交出全面雷達資料，不得拖拖拉拉，遮遮掩掩。此事件充分顯示出中國豪客雖然在各地掃貨，銀紙派頭十足，但中國仍然缺乏硬實力（衞星艦隊、飛機）在遠方運作，難與美國相比，亦都缺乏軟實力勸說、誘使馬來西亞政府願意合作。
幾個月前，一位曾從事移民顧問生意嘅朋友K曾經同左丁山講過：「大陸客最鍾意、最發夢移民美國，做美國公民，佢地去澳洲、紐西蘭，係權宜之計啫，最後都係想去美國。」點解有此心態呢？朋友K問過十幾位大陸客，佢地嘅共通意見係，做咗澳紐加拿大公民，返中國大陸居住、做生意，倘遇上問題，不幸被抓的話，澳紐加大使館／領事館唔會有甚麼大行動，唔敢代公民出頭。但美國政府就唔同，美國人被中國政府扣留，美國大使館會第一時間向中國交涉，令入咗美國籍嘅中國大陸人安心得多。原來如此，唔怪得佢地去到美國，唔怕交美國稅，當交保護費啫！此亦是美國民主制度高明之處，雖則稅率高，但重視人命，重視國民安全，有事就盡量為公民出頭，哪似得環球時報（三月二十八日）發表評論，指內地有人過於偏激，不應以MH370事件成為中馬關係絆腳石咁話！