外號「小丸子」嘅皇仁書院新校長李瑞華呢排有心事，話說平日啲QC仔為咗準備為期兩日嘅開放日，通常星期一到四齊齊走堂整好啲展品，做到10點先走，點知小丸子一聲令下，同學仔得番星期三、四做準備，仲要5點收工，據聞小丸子仲拎住本簿，登記未走嘅同學，話要記名喎！
上星期六開放日一完，成千QC學生校友同女友喺禮堂搞慶功，學生會會長致辭有弦外之音，話呢排同學成日問佢，皇仁係咪變咗？佢話QC過去百五年，都係開放和自由嘅地方，皇仁仔要保持警覺，隨時說不。
當主持話向校長致謝時，現場千人齊噓；輪到向前校長李樂然致謝，QC仔就大聲歡呼；宣佈副校長梁維信退休，更掌聲如雷兼有人大叫「維信BB」。小丸子都好冇face喎！