第二季首個交易日，濠賭股在澳門博彩數字公佈下出現大反彈，雖然數據僅僅符預期，354億澳門元的博彩收入亦較2月份少，但資金顯然技癢飛撲入市。若大家憧憬濠賭股見底，今次可考慮改改炒法，第一，揀位於路氹有地但未開張的博彩股，第二，賭收固然重要，但更看重娛樂設施，澳門賭收已是全球第一，澳門政府多次放風話希望多元化發展，要起更多非博彩設施，全球成功的例子，相信絕對有永利澳門（1128）主席Steve Wynn份。
賭錢難免充滿銅臭味，但要將賭城變得有品味就是Steve的強項，Samantha到拉斯維加斯（L.V.）都鍾意住出自他手筆的Bellagio，呢啲酒店除了有唔少星級餐廳外，娛樂方面亦有長賣長有的"O"和"Le Reve"等。睇到呢度可能已經俾人噓爆，「唔喺掛？新口岸間永利好俗喎！」
話雖如此，年頭時永利出咗份通告，燃起Samantha的希望。永利委任Gamal Aziz任集團總裁，Aziz曾擔任過L.V. Bellagio的高級副總裁，估計路氹項目必有番新氣象。集團剛公佈全年業績，受惠於娛樂場業務收益增加，純利按年升19.6%至77億元，全年派息亦上升，又破天荒地向7,500名員工，每人派發1,000股，無非都係希望留住啲好員工，做好盤生意，故可看高一線。
Samantha
本欄逢周一、三、五刊出