漏網新聞一則：周日大球場七人欖球決賽，梁振英頒發銀盾冠軍時，現場大電視出現佢烚熟狗頭樣，立即出現勁噓，不少人手指公向下搖動。現場主持見狀，三秒左右立即轉鏡頭去南看台cosplay女護士球迷，然後插入熱門勁歌大家一齊唱。此後即使鏡頭pan到主席台，也只見到欖總主席及國際七欖賽高層，冇咗梁振英大頭。嗱！大家學嘢，呢啲就叫做政治技巧，對比今日梁粉政治手段野蠻而粗糙，欖總洋人低調而自然地免除梁振英被狂噓之尷尬場面，又可以避開事後梁粉及民政局抽秤香港欖總是否存心玩嘢。
民意呢家嘢，唔係張志剛、邵善波兩條友求其噏幾句攻擊鍾庭耀民調就可扭轉，呢種低水平政治批鬥方式，只會更加鞏固鍾在主流輿論地位。鍾氏民意研究計劃始於91年，有成廿多年歷史，一句勾結英國特工就可打殘？真好笑。政客受民意監督，向民意負責乃肥彭年代推動香港政治現代化計劃一部份，因此政客及政府支持度民調先開始受重視，但在左派眼中，當然又係霍德、肥彭埋下地雷。呢種睇法，一直無變。
九七老董上場後，亞洲金融風暴後民望下跌，2000年終於忍唔住派家臣兼高級特別助理路祥安向港大校長鄭耀宗施壓，鍾在報紙專欄透露，引發掀然大波，獨立調查委員會指路祥安乃不誠實證人，也認為有施壓，鄭耀宗下台，老董力保路祥安，賠上了政府民望，而鍾氏不畏強權，其民調認可地位更形鞏固。今次兩會期間由李家傑打出第一炮，同十幾年前出發點一模一樣，可見當日派出路祥安向鄭耀宗施壓，為董出此下策者，梁振英好大可能有份策劃，所以十幾年後新仇舊恨又再一次爆發。
民望唔合格 又諉過於人
近日中大亞太研究所公佈定期民調，梁振英評分唔合格得44.3，梁粉批評淨係公佈評分唔公平，因為有人畀零分拉低平均分，當然呢個係歪理，今次民調由中大做，仲係亞太研究所，佳叔劉兆佳曾經長期做揸fit人，中大民調冇理由比英國軍情五處及霍德滲透啦啩？中大真係醒，明知今期梁粉為力挺連任，集中火力攻擊及否定一切不利梁振英民調，所以特別公佈埋mode同median，等梁粉們各取所需，但只要細心從評分百分比分佈可見，比0分有7.7%，比1至49分有42.5%，加埋50.2%，即超過半數比佢唔合格，今次梁粉又點解話呢？
其實大家唔好以為北京靠睇鍾氏民調同中大亞太研究所，佢哋要評估梁振英民望，可能做民調仲密過鍾庭耀，內地研究香港事務單位多的是，經費更多，幾個梁粉吹吹吓就可以否定民調民意？唔知真儍定假癡。事實上中大民調進行時，香港傳媒已被大力整治，河蟹橫行，但3月份調查結果係比2月還要低。在「諉過於人」邏輯下，梁民望越低，則顯示反梁傳媒及港英餘孽勢力越張狂，越要加大政治鬥爭及整治力度，越鬥就民望越低，如狗追逐自己尾巴。
此乃山寨化港人治港之實況，熱衷玩政治，又粗糙、騎呢冇水平，是荒誕劇、鬧劇，也是悲劇。
添馬男