借用那廣告：食神肥韜問：「打邊爐最緊要係咩？湯底？啲料？係個爐呀！」咁贏聯賽最緊要係咩？係「冠軍命」呀！我一直相信，所謂「冠軍命」或冠軍氣質，很多時並非體現在大勝幾多場、班費幾高或人腳幾勁，而是全季總有踢得差的賽事，卻總可輸變和、和變贏。近年最有這種「冠軍氣質」的，首選費Sir執教時的曼聯。
那本季英超誰最有冠軍氣質？常被大炒的阿仙奴首先出局。本來車仔今季幾場波，贏維拉、和西布朗、險勝愛華頓，皆流露着「冠軍相」，可惜關鍵時刻接連敗給維拉及水晶宮兩支弱隊，冠軍氣質蕩然無存。剛重返榜首的利物浦，賽和愛華頓及險勝富咸，均是臨完場才入波；曼城剛仗對阿仙奴尾段被圍攻，最終仍咬住唔輸，似乎都有點「像樣」。
自摩佬2004年首登英超以來，奪冠「潛規則」都是防守最重要。但近8季英超冠軍，有7隊同時是入波最多球隊（當中只有4隊是失球最少）；近4季英超冠軍中，更有3隊是當季聯賽神射手效力其中。如此一來，暫入了88球冠絕英超、坐擁射手榜首次席蘇亞雷斯及史杜列治的紅軍，難道欠缺頂級後衞及門將，都可「爆冷」奪冠？
方柏翹
now足球評述員